काठमाडौं । राखेप सदस्य सचिवको दर्खास्त आह्वानको अन्तिम दिन शुक्रबार अन्तिम समयमा क्रिकेट संघका छुम्बी लामाले समेत राखेपको नेतृत्वका लागि दाबी प्रस्तुत गरे ।
माओवादी केन्द्रभित्र 'हेभिवेट' सदस्य सचिवको खोजी भैरहदा अन्तिम समयमा लामाले सदस्य सचिवमा दाबी प्रस्तुत गरेका हुन् ।
अघिल्लो दिन मात्र उनी युवा तथा खेलकुद मन्त्रालयमा मन्त्री महेश्वर गहतराजसँग छलफलमा पुगेका थिए । घरेलु क्रिकेटको वर्तमान अवस्था र सुधारका लागि गर्न सकिने कामका विषयमा राय लिन मन्त्री गहतराजले लामा सहित राष्ट्रिय क्रिकेट टिमका पूर्व कप्तान पारस खड्कालाई बोलाएका थिए ।
मन्त्री गहतराज समक्ष सदस्य सचिवमा कुनै ईच्छा प्रकट नगरेका लामाले अन्तिम समयमा भने निवेदन हालेका छन् ।
शेरबहादुर देउवा नेतृत्वको सरकारमा खेलकुद मन्त्रालय माओवादीको भागमा छ । राखेपको सदस्य सचिवका लागि माओवादीभित्र सम्भावित नामावलीमाथि छलफल भईरहेको छ । सदस्य सचिवका लागि खुमलटार पुगेका माओवादीका खेलकुद नेतालाई पार्टी अध्यक्ष प्रचण्डले हेभिवेट प्रतिनिधि खोज्न निर्देशन दिएका थिए ।
तर शुक्रबार अन्तिम दिन मन्त्रालयमा परेका १८ जना सदस्य सचिवको निवेदनमा खासै ठुला नाम परेको छैन । निवेदन दिएका १८ जना मध्य खेलाडीको रुपमा दिपक विष्टको अनुहार परिचित देखिएपनि व्यवस्थापकीय हिसाबले खेलकुदमा नेतृत्वदायी भुमिका निर्वाह गरेका कुनै ठुलो अनुहार सदस्य सचिवको दौडमा देखिदैन ।
यही सेरोफेरोमा नेपाल क्रिकेट संघ क्यानका कार्यसमिति सदस्य छुम्बी लामाले सदस्य सचिवमा दाबी प्रस्तुत गरेका छन् ।
सदस्य सचिवमा लामाको दाबेदारीता कति गम्भिर हो त ?
लामा भने खेलकुदमा आमुल परिवर्तन ल्याउने संकल्प र योजना सहित आफुले सदस्य सचिवमा निवेदन दिएको बताउँछन् ।
‘मुख्य रुपमा नेपाली खेलकुदमा आमुल परिवर्तन ल्याउन उम्मेदवार बनेको हुँ । युवा व्यक्ति खेलकुदमा आउँदा ठुलो 'आईसब्रेक' गर्न सक्छ भनेरै दाबी प्रस्तुत गरेको हुँ ।’ लामाले खेलपाटीसँग भने ।
लामालाई नेपाली खेलकुदले चिनेको ७० सालको सुरुवातमा हो ।
उनी क्यानको कार्यालय प्रमुख भएर खेलकुदमा छिरेका थिए । परिवर्तित स्वरुपमा उनी सीओओमा रुपान्तरित बने । क्यान निलम्बनको त्यो अवस्थामा क्रिकेट व्यवस्थापनमा काम गरे । आफुलाई प्रस्फुटित गराए ।
क्यान निलम्बनको समय लामाले पोखरा प्रिमियर लिग (पीपीएल) क्रिकेट सञ्चालनमा ल्याएका थिए । लगत्तै महिला क्रिकेटको फ्रेन्चाईज प्रतियोगिता डब्लूसीएल पनि आयोजना गरे । सानै उमेरमा व्यवस्थापकीय हिसाबले उनीले आफुलाई अब्बल सावित गर्दै आएका छन् ।
‘राखेपमा जति सदस्य सचिव भए, उनीहरु ठुला संघबाट आएनन् । त्यसैले ठुला संघमा रहेर काम गरेका व्यक्तिनै सदस्य सचिवमा आउनुपर्छ । त्यसले समग्र खेलकुद बुझेको हुन्छ ।’ लामा आफ्नो उम्मेदवारीबारे थप प्रष्ट पार्छन् ।
उमेरले भर्खरै ३४ टेकेका लामा आफुलाई सदस्य सचिवको कान्छो उम्मेदवारको रुपमा प्रस्तुत गर्छन् ।
उनी भन्छन्, ‘सम्भवत मै सदस्य सचिवमा दाबी गर्ने कान्छो उम्मेदवार हुनुपर्छ । एउटा युवाले खेलकुदको व्यवस्थापकीय नेतृत्वका लागि दाबी गर्दैछ भने पक्कै केही छ भनेर बुझ्नुपर्छ ।’
‘युवाले अहिलेको पछिल्लो प्रविधि बुझेको हुन्छ । विश्व खेलकुद बुझेको हुन्छ । राजनीतिमा जसरी युवा नेतृत्व आउनुपर्छ भन्ने मान्यता स्थापित हुदैछ । खेलकुदमा समेत मेरो दाबेदारिताले त्यही सन्देश दिन्छ ।’ लामा भन्छन् ।
